بير كيچيك كندده بير ار و آرواد ، اوشاقلاريلا بير ليكده ياشايير ديلار . داردونيادان بير نئچه هكتار يئر و بير اينك ، بير قويون و بير تويوخ وارلارييدي.

بو كند ائوينده ،هر كند ائوينه بنزر كن، بير سيچان قاليردي و اويان بوياندان بير شيئلري اوغولويوب يئييردي .

بو ائوين آروادي بو سيچان دان قورخوردو و بو قورخونو هر آندا اوزويله داشيييردي . بير گون كيشي يه دئدي : آي كيشي ايستيرسن من بو سيچانين قورخوسوندان بير گون دوشوب سكته ائيلي ييم ، منه بير فيكير قيلماليسان . اري فيكره داليب و بير سيچان تله سيني آلماقي سويله دي ، و آرواد بو قراري قبول ائتدي . بو سوزلري سيچان ائشيديردي ، و اولوم قورخوسو اونون جانينا دوشموشدو .

سيچان او گئجه ني ياتا بيلمه دي و هر آندا او تله يه دوشمه ييني يوخودا گوروب و اويانيردي . نه ائيله دييني بيلميردي ، سوندا بو قرارا يئتيردي كي تويوخ ، قويون و اينك دن يارديم ايسته سين و بو فيكير له سحره قدر ياتدي .

سحر چاغي تئزدن تويوغو حيطده يئمك حاليندا تاپيب و اوز سوزونو اونا يئتيردي ، تويوخ بير آن باشيني اونا ساري چئويريب دئدي : منه ربطي اولان بير ايش بو آرادا يوخدور، اوز ايشيندي  منه دخلي بوخدور .

سيچان تله سيك قويونا ساري دوندو ، قويون قاباغيندا اولان اوت علفدن يئييردي ، سيچاني گوره ركن دئدي : هه ، سيچان ندي ، احوالين خوش دئييل ، ده گوروم نه اولوپ . سيچان سوزونو اونا دئدي . قويون دا تويوخ كيمي اونا بير چارا قيلانمادي .

سيچان اينگي آخوردا يونجا يئمك حاليندا گوردو و اونا ساري گئتدي ، اما اينك ده اونا هئچ بير يارديم ائيلييه بيلمدي .

سيچان گليب و اوز يوواسيندا گيزله نيب ، ائشييه چيخميردي ، چون كي تله ني آرواد دوز اونون يوواسينين اونونده اكميشدي .

نئچه گون بئله بير حالدا كئچدي . بير گون بير ايلان او ائوه ياخينلاشيب و اوزونه يئمك آختاريردي ، آرواد ائوده ايشله ييردي ، بير آندا ايلان آروادين توپلوغوندان سانجيب و سرعتله اوزاقلاشدي ، آروادين سسي يئره و گويه قوپدو ،.......... .

حكيم لر آروادين باشي اوستونه گليب و علاجيني تويوخ سويو يئمك ده گوردولر ، كيشي تويوغون ياشيني كسديريب ، سويونو آرودا يئديديردي .

آروادين خسته ( ناخوش) اولدوغونا گوره تانيشلار قوناق گليرديلر ، كيشي قوناغلار اوچون قويونون باشيني كسديردي  .

بير نئچه گوندن سونرا آرواد بو يارادان اولدو، ياس مجلسي توره ندي، باش ساغليغينا گلن لر اوچون كيشي اينگي كسديريب و احسان وئرديردي .

اما بيزيم ناغيلدا اولان سيچان ساغليقلا اوز يوواسيندا قالميشدي ، بو آرادا سيچان تله سيني اورادان گوتوروب ائشيگه آتميشديلار .

عزيز دوستلار بو ناغيلدان نه باشا دوشدوغونوزو بيلميرم آما گلين بيز او تويوخ و قويون و اينك كيمي يالنيز اوز فكيريميزده اولميياق بيز بير توپلومدا ياشاييرك و اوز اطرافيميزدا اولان لارين دا ايشلرينه گرك فيكير وئرك .

يازيليب87/01/18ساعات 23:24 علی احمدزاده| |